Наставничкиот пленум бара планираното зголемување на платите за вработените во образованието од седум отсто, кое е предвидено со годинашниот државен буџет, согласно со колективниот договор и поврзано со покачувањето на минималната плата, да се пресметува и реализира веќе од 1 март.

Во барање до ресорниот министер Јетон Шаќири, Пленумот наведува дека просветните работници се незадоволни и се чувствуваат дискриминирани во однос на другите вработени во јавниот сектор поради тоа што секторот образование е изземен од исплатата на регресот (К-15).

Наставниците бараат и организиран превоз, месечен билет за јавен превоз или месечен надомест за патни трошоци за просветните работници што патуваат на работа во рурални средини или од една во друга општина, како и надомест за одделенските наставници кои работеа дополнителни часови со учениците за време на онлајн-наставата во периодот на пандемијата во учебната 2021 година.

-Ако нашите барања не бидат земени предвид, ние, наставниците на Наставнички пленум, предвидуваме бојкот на наставата, штрајк или протести и ги повикуваме да ни се придружат сите синдикати од секторот образование и сите граѓански образовни здруженија, како и здруженијата на родителите, се наведува во барањето до министррот Шаќири.