Најдолгата инфекција со новиот коронавирус кај едно лице, пред да почине од последиците на ковид-19, траела 505 дена, објавија денеска британските научници.

Претходно еден пациент бил позитивен на САРС-КоВ-2 цели 335 дена.

Кај повеќето луѓе кои се заразиле со овој вирус телото е способно да ја преброди и победи инфекцијата, но пациентот кој бил позитивен 505 дена во континуитет имал многу ослабен имунолошки систем и повеќе коморбидитети.

Првиот позитивен тест го имал на почетокот на 202о година, а потоа пациентот бил позитивен при сите останати тестирања, се до смртта во 2021 година.

Научниците кои го проучувале вирусот кај 9 ковид пациенти во Лондон, утврдиле дека кај имунокомпромитираните лица би можеле да се појават нови ковид варијатни.

Научниците од лондонскиот Кинг Колеџ и од Фондацијата Guy’s and St. Thomas’ NHS Foundation Trust своите резултати од истражувањето ги претставиле на Европскиот конгрес за клиничка микробиологија и заразни болести во Лисабон.