Повеќе од 5.000 српски полицајци и припадници на тајните служби, како и 30 руски безбедносни службеници ќе ја обезбедуваат посетата на рускиот премиер Димитриј Медведев во Белград, објави „Вечерње новости“, наведувајќи дека „безбедноста во главниот град на Србија ќе биде подигната на највисоко ниво“.

Голем број на обезбедувачи се неопходни бидејќи Медведев за време на дванаесетчасовната посета во Белград ќе оди на осум локации, па секоја локација мора да биде безбедносно покриена во текот на целиот ден, кажа неименуван извор на „Вечерње“.

Премиерот на Русија по доаѓањето во Белград, каде ќе го дочека премиерката на Србија Ана Брнабиќ, со претседателот Александар Вучиќ на воениот аеродром во местото Батајница ќе присуствува на воена вежба и приказ на способностите на Војската на Србија. Потоа, следи свечениот дочек пред Палатата на Србија, како и работен ручек со премиерката и членовите на делегациите на двете држави.

Вучиќ и Медведев, според предвидениот протокол, ќе разговараат 45 минути, а потоа рускиот премиер ќе положи венец на споменик на тврдината Калемегдан.

Медведев ќе присуствува и на свечена академија по повод 75-годишнината од ослободување на Белград, а руските државници потоа ќе одат на вечера.