Муцунски: Попис во септември е разумно решение во време на пандемија
Одложувањето на пописот за септември е разумно решение во период на пандемија, истакна пратеникот на ВМРО-ДПМНЕ Тимчо Муцунски одговарајќи на новинарски прашања при денешната посета на Ресен.
Тој очекува дека ќе биде испочитуван договорот од средбата меѓу лидерите на ВМРО-ДПМНЕ Христијан Мицкоски и на СДСМ Зоран Заев и пописот да се одржи во септември.
– Што се однесува до пописот, има договор за одложување и тоа треба да се почитува. Не затоа што има договор, туку затоа што е единствено разумно решение во оваа пандемија во која што гледаме огромен број на наши сограѓани заболени, гледаме крах на здравствениот систем и за жал многу мртви случаи. Тоа е една огромна трагедија која што и се случува на Македонија и затоа пописот треба да се одложи, рече Муцунски.
Според него, граѓаните го побараа одложувањето и разумно е од страна на институциите на системот да постапат во таа насока.