Тинејџер бил каснат од крокодил додека бил евакуиран од поплавите во Австралија. 17-годишното момче било каснато „на задниот дел од ногата“ додека напуштало оддалечена заедница, пренесува „Би-Би-Си“.

Австралиските одбранбени сили се повикани да им помогнат на оддалечените области погодени од поплавите по обилните врнежи кои го погодија северниот дел на земјата.

Од владата велат дека околу 700 луѓе биле иселени од Калкаринџи, околу 770 километри јужно од Дарвин, откако реката Викторија излетала од коритото.

„Министерството за одбрана ни даде три големи авиони и тие работат да ги пренесат евакуираните до Кетрин“ велат властите.

Територијата прогласи вонредна состојба во четири оддалечени области. Контролорот за вонредни состојби Даниел Бејкон рече дека патиштата до голем број оддалечени заедници остануваат отсечени и ги повика луѓето да се држат настрана.