Славјанка Петровска научила да плива на многу рана возраст во Дојран. Како министерка одмарала само на две места, во Македонија, а ако некој ја бара и не знае каде е, вели дека ќе ја најде на едно место во Црна Гора. Поранешната министерка за одбрана и актуелна пратеничка од СДСМ е наша гостинка во емисијата „Мое лето“.

Оваа година нејзиниот избор за одмор е Анталија. Не ѝ е важно каде оди на одмор, туку најважно ѝ е друштвото, како што вели, сака да оди на одмор со некој со којшто може да молчи и да ѝ биде убаво.

Фамилијарните одмори и патувања за неа имаат посебно значење. Како најинтересни ги издвојува моментите поминати во автомобил кога патувале до некое ново место. Премногу била љубопитна како дете и поставувала многу прашања, па затоа и често ѝ купувале енциклопедии, а за време на патувањата родителите „ја испрашувале“, открива таа.

Петровска во емисијата, со посебни емоции, се присетува на убавите денови поминати со нејзиниот покоен брат, кој бил постар од неа, но во одреден дел од животот таа ја имала заштитничката улога.

-Мојот брат беше постар од мене четири години. Тој за разлика од мене беше многу попалав, па во одреден период од животот јас морав да го кријам од нашите, па на некој начин бев принудена и да излажам дека се вратил на време и слични бели лаги, за да не го караат – раскажува таа.

Биле блиски и често ја викал со неговото друштво, бидејќи, како што вели, била забавна.

-Јас не бев немирна, но бев интересна како дете, кажував смешки и знаев многу вицеви, па важев за забавна во друштвото на брат ми – објаснува таа.

Во периодот кога се случила трагедијата, кога Петровска го загубила брат ѝ, една книга ѝ помогнала да го преброди тој период.

-Постои една книга, којашто е мала, но многу моќна за мене. Би ја препорачала на сите коишто минуваат низ некаков тежок период. Јас ја прочитав во еден период кога ми беше многу тешко. Плачев многу кога ја читав, но и покрај тоа што е со тажна содржина, јас одново и одново се навраќам на неа, затоа што на чуден начин ми помага во врската со мојот брат. Којзане, можеби тоа се некои неискажани зборови од него – вели таа.

Во емисијата ќе го дознаете и насловот на книгата.

Во „Мое лето“ таа издвојува една интересна случка од минатото кога била средношколка.

-Во средно се дружев многу со една другарка и еден другар. Кога бевме прва или втора година, посакавме да славиме Нова година сами надвор од Скопје. Другарот имаше викендичка во Маврово. Моите на почетокот беа скептични и се колебаа дали да ме пуштат, на крајот татко ми пушти срце и сите нè однесе до Маврово. Ни објасни како се пали оган и други практични работи за тоа како да се снаоѓаме сами. Сè се одвиваше добро до третиот ден, кога снема струја. Ние баш тогаш раскажувавме за некој крими-роман што беше актуелен тогаш, мислам од македонски автор. Откако со часови не доаѓаше струјата, изгасна и огнот, почнаа да капат стреите, почна да ни се присторува дека доаѓа некој. Се исплашивме и одлучивме да се вооружиме со секирата за дрвата, метли, лопати, сè што најдовме за да се одбраниме. Утрото кога стигнаа моите се чудеа што се случило, а кога им раскажавме, беше смеење – вели таа.

Се сеќавате ли на попопуларната кучка Стела, која се качи на бината за време на еден говор на Петровска додека беше министерка? Ни раскажува за ова кучка која е „роден политичар“, а сега ја чува дома.
Погледнете ја новата епизода на „Мое лето“ на јутјуб-каналот на „Слободен печат“.

Водител и автор на емисијата е Александра Вуксановиќ.

МОЕ ЛЕТО | Апасиев: Имам фобија од летање, а и кој социјалистички лидер се возел со авион?

МОЕ ЛЕТО | Каја Шукова: Сопругот ми е љубов од средношколските денови, се најдовме по две децении