Поранешниот шеф на УБК, Сашо Мијалков заедно со осудените во „Титаник 2“ денеска од Апелациониот суд побараа да се укине пресудата на Кривичниот суд бидејќи како што рекоа, биле невини.

Мијалков кој беше осуден на три години за случајот, очекува Апелациониот суд да донесе правилна одлука.

-Јас верувам дека ќе донесете правична одлука, бидејќи верувам во вашиот судски интегритет. Моите бранители ги опфатија сите аспекти од формален карактер и ги изнесоа сита наводи со кои не се согласуваме, а се наведени во пресудата- рече Мијалков.

Според адвокатите на осудените, случајот кој се однесува на договорено гласање во ДИК за приговор за локалните избори во Струмица во 2013 се темели на претпоставки.

За изборните нерегуларности на локалните избори во 2013 година поранешниот директор на УБК Сашо Мијалков доби казна затвор од три години, исто толку добија и Анета Стефановска, Влатко Сајковски и Сашо Срцев, додека лидерот на ДПА Мендух Тачи доби три години и два месеца, а највисока казна од четири години и шест месеци му беше изречена на Бедредин Ибраими.