Мицкоски на протестот пред Собрание: Вистинско време е Европа да му даде на овој народ иднина без никакви уцени и условувања
Денеска имаме држава, ама немаме слобода. Тврдината што ја правеа револуционерите, СДСМ ја руши парче по парче, порача од пред Собрание лидерот на ВМРО-ДПМНЕ, Христијан Мицкоски. Протестот со автомобили ќе продолжи од Скопје до Штип преку автопатот Гоце Делчев, а во Штип ќе заврши пред Учителската школа каде своевремено учителствувале Гоце Делчев и Дамјан Груев.
– Македонија мора да отпочне преговори со ЕУ час поскоро, тоа е нашата единствена иднина. ВМРО беше создадено за таа европска иднина. Македонија даде илјадници жртви против фашизмот и комунизмот. Македонија е браникот во кој се бранеше Европа од мигрантските бранови. Македонија дала и секогаш дава за Европа. Вистинско време е и Европа да му даде на овој народ иднина без никакви уцени и условувања – рече Мицкоски.
Тој се обрати и кон соседна Бугарија.
– Увререн сум дека и вас не ви требаат понижени соседи. Со мафијашка структура на власта на Заев не можете да се договорите, зашто тој го менува мислењето по неколкупати на ден – рече Мицкоски.
Лидерот на опозицијата во својот говор се осврна и на Гоце Делчев и македонскиот јазик.
– Доколку навистина биде признаено и прифатено дека Гоце Делчев е роден во Македонија, и тој е Бугарин по нација, а македонскиот јазик е признаен како дел од бугарскиот и тоа Заев го преточи во одлука. Таа одлука веднаш ќе ја поништитем кога ќе дојдеме на власт и ВМРО-ДПМНЕ никогаш во иднина нема да ја почитува – рече Мицкоски.