Мицкоски: Програмата „Платформа 1198″ има проекти што ќе ја преобликуваат иднината
Визијата „Македонија повторно твоја” е Македонија во која веруваш, и која ја сакаш и ја заслужуваш. Македонија на успеси, Македонија за која навиваш и со која се гордееш. Македонија на реформи, проекти, на работа, Македонија во која има ред, систем, поголеми плати и пензии, работа за сите, потенцираше во својот говор на митингот во Кавадарци претседателот на ВМРО-ДПМНЕ, Христијан Мицкоски.
Според него, во програмата „Платформа 1198″ има конкретни проекти што ќе ја обноват и ќе ја преобликуваат иднината, но и кои ќе утврдат јасна траекторија за граѓаните.
Од здравство до образование, од економија до земјоделство, од инфраструктура до вработувања, правда, еднаквост, закон и ред. Нашата „Платформа 1198″ е отисок на позитивна промена, која допира до суштината на твоето секојдневие и те става тебе на прво место. Тоа е нашата заклетва дека граѓаните на Македонија секогаш ќе бидат на прво место. Иднината не е апстрактен концепт, таа е опиплива реалност која може да се обликува со твоите раце. Со оваа Платформа, промените во кои можеш да веруваш, се во твоите раце. Кај тебе е палката, која ти дава сила да ја направиш Македонија да биде повторно твоја, нагласи Мицкоски.