Меџити во ОН: Здравствена инфраструктура е под тежок притисок, ранливите заедници го понесоа товарот
Министерот за здравство Фатмир Меџити се обратил на седница на 78. Генерално собрание на Обединети Нации на тема „Превенција на пандемии, подготвеност и одговор на истите”, соопштија од Министерството за здравство. Во обраќањето тој се осврнал на предизвиците со кои здравствените системи се соочија насекаде во светот во екот на корона-кризата, како и за товарот што здравствениот систем во Македонија го носеше во борба со Ковид-19.
Пандемијата со Ковид-19 го истакна значењето на здравите и силни здравствени системи, беспрекорната координација и ефективни механизми за одговор. Северна Македонија не беше изземена од нејзините разорни влијанија. Нашата здравствена инфраструктура е под тежок притисок, а ранливите заедници понесоа непропорционален товар. Нашиот одговор мора да биде брз, со еднаков пристап кон сите и напреден. Еднаквиот пристап е во срцето на нашата стратегија. Ја зајакнуваме јавната здравствена инфраструктура, ги подобруваме системите за надзор и даваме приоритет на недоволно опслужените заедници – истакнал Меџити.
Како што соопштија од Министерството, тој заклучил дека е потребна солидарност меѓу земјите и колективен одговор, како во размена на искуства и експертизи, така и во размена на информации и спречување на дезинформации.
Гледајќи напред, ние се обврзуваме на натамошно градење на отпорност на здравствениот систем. Северна Македонија е отворена за меѓународна соработка и партнерство за постигнување на овие цели. Само со заеднички одговор во време на пандемии и здравствени кризи може да ги заштитиме нашите граѓани, да го зајакнеме нашиот здравствен систем и подобро да се подготвиме за идни предизвици, се наведува во изјавата на Меџити.