Маестро Џамбазов и златните славејчиња претставени на мурал во Дебар Маало
Mурал на кој е претставен македонскиот композитор и диригент Александар Џамбазов заедно со златни славејчиња од вчера го украсува ѕидот на зграда на улицата Орце Николов во Дебар Маало. Муралот го насликаа уметниците Драган Китановски-Драш и Марјан Димиќ-Мачка. Градоначалникот на Општина Центар Горан Герасимовски најавува настан со учество на познати македонски уметници и членовите на хорот „Златно славејче“ на 25 јануари наредната година, кога ќе се одбележи двегодишнината од смртта на Џамбазов.
Навистина е задоволство да се има муралот на доајенот Александар Џамбазов кој со својот неверојатен творечки опус остави неповторлив белег во својата професија и нашата историја. Тој беше автор на детски песни, иницијатор за формирање на фестивалот „Златко славејче“, пишувач на сценска и филмска музика, македонски диригент и композитор и великан на современата македонска музика. Настанот на 25 јануари ќе претставува своевидно потсетување на музичкиот опус на основачот на детскиот фестивал и доајен Александар Џамбазов – вели Герасимовски.
Минатата година за 70-от роденден на Горан Стефановски, градоначалникот Горан Герасимовски со наслов од „Горан за Горан“ мурал од Стефановски беше насликан на ООУ „Коле Неделковски“. Летово на Културниот центар „Јадро“ и ООУ „Димитар Миладинов“ насликани беа графити инспирирани од 60-та годишнина од земјотресот во Скопје.