ЛШ: Еурофарм Пелистер имаше и пет голови разлика, на крајот загуби убедливо од Пик Сегед
Еурофарм Пелистер никако да ја прекине серијата порази од почетокот на сезоната во ракометната Лига на шампионите. Денеска македонскиот првак загуби во Унгарија од Пик Сегед со 34:26 (18:19) за седми пораз во рамките од групата „А“.
Првото полувреме му припадна на нашиот претставник контролирајќи го резултатот во своја корист, најпрвин од почетокот одржуваше позитива од два голови разлика, а истата се зголеми и на „плус четири“ во следниот период (7:3, 8:4).
Битолчани успеаја и двапати да дојдат и до највисоки пет голови разлика (9:4, 10:5), но до паузата дозволија домаќините да ја намалат својата негатива и по првиот дел Еурофарм Пелистер имаше само минимални 19:18.
Нашата екипа водеше и на стартот од второто полувреме со 20:19 и 21:20, но потоа следуваше голема серија на противникот од 7:0 за 27:21 на семафорот.
Сега Унгарците го одржуваа водството во нивна полза, не дозволувајќи му на тимот на Ангеловски да се доближи резултатски, а негативата стана уште поголема кога при 28:25 за домаќините, Пик Сегед се погрижи за нова низа на погодоци (33:25) и тука веќе беа решени сите дилеми околу победникот.
Најефикасен во редовите на Еурофарм Пелистер беше Василев со пет голови, а по четири имаа Радивојевиќ и Атанасијевиќ. Следниот меч играчите на тренерот Бранислав Ангеловски ќе го имаат на 22 ноември повторно против Пик Сегед, но овојпат во салата „Боро Чурлевски“ во Битола.