Во одбојката има многу бројки и комбинаторики, но кажано со наједноставен речник, само еден натпревар може да ја однесе најдобрата македонска машка одбојкарска репрезентација на четврто европско првенство едноподруго.

Шансите се реални, нашите одбојкари в недела ќе ја пречекаат Грција во СЦ „Јане Сандански“ од 20.15 часот. Триумф на избраниците на селекторот Хари Наковски ќе значи прво место во квалификациите и остварување на целта.

Македонскиот примач во националниот тим Александар Љафтов знае дека публиката може да биде клучниот адут за наш успех. Потсетување дека влезот е бесплатен за овој важен меч за сите љубители на одбојката и спортот.

Потсетување дека нашата селекција на стартот од квалификациите за пласман на ЕП 2026 славеше на гостувањето кај Грузија со 3:0.

– Беше многу важно што победивме над Грузија. Знаеме дека се сметаат победите, па освоените сетови и поен количникот, затоа одигравме добри три сета против Грузијците. Следува најважниот дуел против Грција, ако победиме, со една нога сме на Европското првенство 2026. Прво, да го одиграме натпреварот, па потоа ќе размислуваме што понатака. Ги повикувам сите навивачи да ни ја дадат поддршката, со надеж дека на крајот сите заедно ќе се радуваме на голема победа. Доколку не го оствариме тоа, тоа нема да биде крај на шансите, ќе имаме уште два натпревари – вели Љафтов.