Откако лани беше вицешампион во македонската ракометна Супер лига, Алкалоид во новата сезона ќе игра во групите на ЕХФ Европската лига.

Младите и талентирани играчи предводени од тренерот Кирил Лазаров се во групата „Ф“ заедно со Бјерингро-Силкеборг (Данска), Логроњо Ла Риоха (Шпанија) и РК Војводина (Србија).

Првиот официјален европски меч РК Алкалоид ќе го има во Скопје против Војводина на 17 октомври во СЦ „Јане Сандански“.

– Настапот во Европската лига е ново поглавје и искуство за нас како клуб. Ќе играме против веќе добро етаблирани тимови во ЕХФ клупските натпреварувања. Нашата цел е да се подготвиме и да го започнеме секој натпревар со позитивни мисли, како и победнички менталитет затоа што исто така ја претставуваме нашата земја во Европа. Конечно, едвај чекаме да започне Европската лига и ќе се обидеме да се претставиме како конкурентен тим кој никогаш не се предава. Воедно, за квалитетна и конкурентна репрезентација е од суштинско значење да има силни клубови во домашната лига каде што македонските играчи ќе имаат клучна улога – се зборовите на Лазаров на официјалниот сајт на ЕХФ.

РК Алкалоид е еден од најмладите состави во групната фаза на Европската лига со просечна возраст од само 24 години.