Крадци оперирале низ викендици во Дојран, определен притвор за едно лице
Полицијата вчера ги уапси 27-годишниот Р.Б. од село Николиќ и С.С.(31) од Нов Дојран. Јавното обвинителство Гевгелија денеска поведе постапка против едно лице бидејќи во период од мај 2021 до 19 септември годинава крадел предмети, мебел и апарати од викендици на различни локации во Стар и Нов Дојран, додека сопствениците не престојувале во нив.
Меѓу ограбените се и објекти на две правни лица, од каде биле одземени целосно системите за видео надзор – камери и ресивери, телевизори, клима уреди и друга опрема – соопшти ОЈО.
Осомничениот влегувал во објектите со провалување или кршење со намера да одземе туѓи подвижни предмети од поголема вредност и противправно да ги присвои, и на тој начин прибавил за себе противправна имотна корист во вкупна вредност од 2.254.350 денари.
По предлог на јавниот обвинител, судијата на претходна постапка на осомничениот му определи мерка притвор.