Откако заврши јавниот повик на Општина Битола за субвенционирање на дел од трошоците на граѓаните за набавка на инвертер клима уреди, поради големиот интерес, градоначалникот Тони Коњановски побара од Советот на Општина Битола да донесе одлука за проширување на предвидените средства за оваа намена, со цел да се создаде можност за субвенционирање на сите граѓани кои доставиле комплетна документација и ги исполнуваат условите од јавниот повик.

-Имајќи предвид дека планираниот буџет за оваа намена изнесува еден милион и шестотини илјади денари со пресметан персонален данок што се недоволно средства за сите заинтересирани, до Советот на Општина Битола ќе побарам усвојување на ребалансот на буџетот и донесување на одлука за дообезбедување на финансиски средства за субвенционирање на сите граѓани кои што аплицирале за инвертер клима уреди, ги исполнуваат условите во повикот и доставиле комплетна документација до Општината Битола. Очекувам Советот на Општина Битола да го прифати ова мое барање и сите граѓани кои што имаат комплетна документација да добијат надоместок од 30% од вкупната цена на чинење на уредот, до максимумот од 18 илјади денари. Само на овој начин ќе се овозможи реализација и на други планирани субвенционирања, согласно програмата за животна средина, но истовремено ќе покажеме дека работиме во интерес на битолчани, изјави Коњановски.