Вчерашното невреме предизвикало поплава во Клиниката за анестезија, реанимација и интензивно лекување (КАРИЛ), по што здравствените власти денеска одлучиле да не се примаат нови пациенти.

На клиниката во моментов има пациенти и таа работи, но поради поплавени магацински простории, од безбедносни причини е донесена одлуката да нема нови пациенти, изјави за Канал 5 министерот за здравство Беким Сали.

Пациентите кои доаѓаат на КАРИЛ од Скопје, како што откри министерот, се препраќаат во ГОБ 8 Септември и во Клиничката болница Наум Охридски, оние од источна Македонија во Клиничката болница Штип, пациентите од централна Македонија во Клиничката болница Битола, а оние од западна Македонија во Клиничката болница Тетово.

Во дописот што Сали претходно им го испратил на директорите на клиниките, не се споменува поплавата, туку се соопштува дека поради „технички проблеми“ на единицата за интензивно лекување, итните пациенти ќе се препраќаат во останатите поголеми клинички центри низ земјата.