Европската фудбалска федерација ги објави резултатите од натпреварувањата кои се под нејзина јурисдикција и бројките откриваат неверојатна доминација на Шпанија и на шпанските екипи.

Од можните 56 трофеи, Шпанците освоија неверојатни 26 и имаат повеќе трофеи од Англичаните (8), Германците и Французите (по 6) заедно.

Голем удел во доминацијата имаат двата шпански гиганти, Реал Мадрид и Барселона. Реал Мадрид од 2014 до 2018 година доминираше во Лигата на шампионите, а во првата половина од изминатата деценија Барселона беше тимот кој освојуваше трофеи.

Барселона триумфира два пати во Лигата на шампионите (2011 и 2015), додека Реал Мадрид тоа го направи четири пати (2014,2016,2017,2018). Што се однесува до вкупниот број на финалиња и настапи во Суперкупот на УЕФА, Шпанија има 37 учесници, Англија има 20, а Франција и Германија по 12.

Реал Мадрид со седум трофеи во сите меѓународни натпреварувања под капата на УЕФА е најуспешен клуб, а по него следат Атлетико Мадрид и Севиља со вкупно шест титули.

Кај дамите доминира францускиот Олимпик Лион со шест титули од осум финалиња.