Промоцијата на новиот албум „The back of beyond“ на композиторот Кокан Димушевски се одржа на 20 септември во „Аудиокултура“ во Скопје. Станува збор за негов прв самостоен албум објавен на винил.

Винилот има свое македонско, српско и хрватско издание во ограничен тираж, а извршен продуцент на изданието е Тошо Филиповски од „Корпус деликти рекордс“.

– Изданието може истовремено да се најде во Србија, во Хрватска и во Македонија. Отпечатено е во 300 примероци и во секоја од трите држави се дистрибуирани по 100 примероци – објасни Филиповски.

Албумот содржи осум композиции на кои Кокан Димушевски е комплетен автор и изведувач. Материјалот бил осмислен, отсвирен и снимен во времето на ковид-пандемијата во период од десетина дена. Немало конкретен мотив или инспирација, туку Димушевски го свирел тоа што во тие моменти излегувало од него, како космичка или божествена енергија, а тој бил само алатката што ја претворала во музика. Сите композиции се снимени „од прва рака“, или „во еден здив“, и немало доснимување или корекции отпосле.

– Целиот материјал содржи десет композиции, но бидејќи просторот на винилот е ограничен на 20 минути од двете страни одлучив албумот да содржи осум нумери – објасни Димушевски.

Слушачката промоција на албумот во „Аудиокултура“ беше реализирана преку системите на „teoharov Audio“.

(Текстот е објавен во „Културен печат“ број 197, во печатеното издание на весникот „Слободен печат“ на 23-24.9.2023)