За 2022 година 13.930 работници примиле регрес за годишен одмор, 9.536 не го добиле целиот износ, а 479 работници не примиле ниту денар, прецизираше директорката на ДИТ, Томовска. Таа потврди дека и годинава некои фирми исплатиле по 1, 10 или 20 денари на име регрес и за тоа е виновно неприцизното толкување на најнискиот износ на К-15, ако фирмата пријави дека има финансиски потешкотии. Таа апелираше до Организацијата на работодавачи и ССМ да седнат и да ја доусогласат и допрецизираат Спогодбата која ја потпишале во далечната 2015 година, оти нејзината непрецизност им ги врзува рацете на трудовите инспектори.

-Нашите инспектори се правници, а не се вешти лица за да ја толкуваат одредбата колку треба да биде низок прагот на минималниот износ на К-15, ако фирата пријави дека има проблеми со ликвидноста. Износот не е дефиниран и затоа има фирми кои и годинава исплаќаат по 1, 10 или 20 денари на име регрес. Вака е оставено на дискреционото право на работодавачот да ја одреди минималната сума и ние тука сме немоќни да интервенираме – објасни Томовска.

Според Томовска, работниците се повеќе се охрабруваат да си ги бараат и бранат своите права кои им следуваат и тие може и електронски и анономно да ги пријавуваат своите газди. Одговарајќи на новинарско прашање, таа откри дека досега од медиумите не примила поплака во врска со исплатата на регресот за годишен одмор, а првата пријава според која постапиле е од националниот сервис.