Инспекциските служби на Општина Аеродром спроведоа акција за остранување на дивите пазарџии и препродавачи во Реонски центар, кои притоа не биле казнети, но им било наложено веднаш да ги тргнат дивопоставените импровизирани тезги, со опомена истото да не го повторат во иднина, информираат од оваа скопска општина.

-Општината излезе на терен и постапи по пријави на граѓани и околните стопанственици, кои со години испраќале поплаки до Општината. Нашата намера е да ја спречиме и превенираме оваа честа појава која не само што претставува лоша слика за овој фреквентен дел од Аеродром, го попречува слободното движење на граѓаните и зафаќа дел од паркинзите, туку и ја поттикнува и развива сивата економија. Општина Аеродром ги интензивира инспекциските контроли на терен и застанува на страната на граѓаните и чесната приватна иницијатива на секој што на легален начин се занимава со ваквите сродни дејности – велат од Општина Аеродром.