„Гранде“ Пандев: Навивам за Македонија, сè може да се случи против Италија
Поранешниот македонски репрезентативец ја започна сезоната во редовите на Џенова, а оваа зима се пресели во екипата на Парма.
Горан Пандев (38) досега во италијанската Серија Б во дресот на Парма запиша три настапи и еден гол во триумфот над Порденоне (4:1).
Тој е моментно најдобар стрелец во историјата на нашата А селекција, запиша вкупно 38 голови во 122 настапи.
Многу помогна за првпат да се најдеме на само две победи од пласман на Светско првенство, а како што е веќе познато на 24 март му гостуваме на актуелниот европски шампион Италија во полуфиналето од мундијалскиот бараж.
Целата своја кариера „Гранде Пандев“ ја имаше токму на италијанско тло, па во интервјуто за „parmacalcio1913.com“ го сподели своите очекува околу претстојниот дуел.
– Навивам за мојата земја, ќе биде тврд меч, се надевам дека Македонија ќе победи. Сè може да се случи – вели Пандев.