Градоначалникот на италијанскиот град Месина, Катено де Лука, познат по своите недипломатски и остри пораки, ги предупреди граѓаните во најновото видео-обраќање од неговиот кабинет да ги почитуваат ограничувањата и забраните воведени во времето на пандемијата на коронавирусот, пренесуваат медиумите.

Тој ги повика граѓаните да ја почитуваат социјалната дистанца дури и во брачниот кревет и забрани секс до крајот на октомври. Де Лука потсети дека не е дозволено групно дружење ниту „романтичен риболов“, што е локален термин за љубовни состаноци.

– Внимавајте ако откријам дека се бакнувате, прегрнувате, а ниту „она другото“ не е дозволено. Засега, на љубовен план, мора да се држиме до тотална апстиненција. Да се разбереме, тешко на оној што ќе го прекрши правилото за апстиненција. И повторувам уште еднаш, до 31 октомври на сила е тотална апстиненција – порачал убедливо Де Лука.

Во своето последно обраќање, тој конкретно им рече на граѓаните на Месина дека мора да се воздржат од сексуални односи и дека дури и дома и во кревет мора да држат растојание од најмалку еден метар.

Порано Де Лука воведе дронови за да контролира дали граѓаните на Месина ја почитуваат забраната за излегување од дома. Дроновите ги надлетуваа не само градските улици, туку и селата и шумските патишта, а беа опремени со звучници преку кои градоначалникот налутено им се обраќаше на оние што беа надвор, а не смееја.