Неформалната група „Арт активизам” од Тетово во својата денешна акција насловена „Внимавај каде паркираш” на непрописно паркираните возила им поставуваше т.н. „казнени билети“ со цел да им укажат на возачите од потребата за поголема совесност при паркирањето и со апел да се внимава на безбедноста на граѓаните и пешаците чии места за движење се узурпирани од возилата.

– Предупрепредување, важи за вашето возило, треба да научите како да паркирате, се вели во пораката на флаерот залепен на возилата.

Покрај предупредувањата, активистите поставија и пофалници на оние возила кои се прописно паркирани со цел да ги поддржат и истакнат совесните возачи.

– Еден од најчестите проблеми со кои се соочуваат граѓаните на Тетово е сообраќајниот хаос. И покрај воведувањето на зонското паркирање, тешко се наоѓаат слободни паркинг места. Поради ваквата ситуација секој паркира каде што ќе стигне. Од една страна, општината не обезбедува доволно простор за паркинг, а од друга ако возачите се паркираат погрешно, експресно ги казнуваат. На двата главни булевара во Тетово, „Илирија” и „Илинденска”, сообраќајот се одвива на половина од коловозната лента поради паркираните комби такси превозници и други возила со што метежот во сообраќајот во овие улици станува се’ поголем, истакнуваат групата активисти.

Тие потсетуваат дека со години наназад возила се паркираат на пешачката зона на самиот плоштад.