Претседателот на Собранието, Африм Гаши, упати честитка до граѓаните по повод 34-годишнината од осамостојувањето на Македонија, повикувајќи на обединување околу вредностите на сплотеност и посветеност за исполнување на аспирациите на земјата.

„Денот на независноста е посебен момент, можност да се потсетиме на големите достигнувања на нашата држава. Независноста не е само подарок, туку завет наследен од минатото, обврска за сегашноста и водич за иднината. Овој завет нè обврзува да изградиме силна, демократска и стабилна држава, каде што секој граѓанин без разлика ќе се чувствува еднаков и почитуван“, истакнува Гаши.

Тој нагласува дека е време секој да придонесе во зајакнување на мирот, стабилноста и соживотот и заедно да се работи за посилна, поправедна и пообединета држава.

„Само со сплотеност и заедничка посветеност можеме да ја реализираме визијата за посветла иднина на нашата држава и за идните генерации. Северна Македонија, 34 години по прогласувањето на независноста, е држава која напредуваше во многу аспекти и стекна почит на меѓународната сцена. Како стабилен сојузник на НАТО и земја кандидат за членство во Европската Унија, овој момент од нас бара да продолжиме со напорите за изградба на побезбедна и посветла иднина“, додава Гаши.