Хајди Клум се најде на насловната страница на германското издание на женското списание „Гламур“.

Таа го најави интервјуто на својот инстаграм-профил и напиша: „Уау, моите крила сѐ уште ми прилегаат“, алудирајќи на нејзиниот период од кариерата кога беше „ангел“ на „Викторија сикрет“.

Германската манекенка и модна икона, која минатата година наполни 50 години, вели дека никогаш не се чувствувала толку атрактивно како што се чувствува на оваа возраст.

Клум вели дека не планира да ги следи општествените правила за тоа како треба да се облекува една жена во шестата деценија од својот живот.

„Да, имам 50 години, но не сум мртва. Јас сакам шарени и гласни нешта. Можеби тоа ќе се смени во некој даден момент во иднина, но засега – ова е мојата одлука“, вели таа за „Гламур“.

Манекенката има слични размислувања и во врска со разликата во години со нејзиниот сопруг, 34-годишниот музичар Том Каулиц.

Клум стапи во брак со гитаристот на музичката група „Токио хотел“ во 2019 година и вели дека „сака да живее во моментов“ со својот партнер.

„Времето нема да застане за мене, а Том никогаш нема да ме стигне. Секогаш ќе бидам 16 години постара од него и го знам тоа. Знам дека ќе изгледам постаро од него. Можеби за десет години ќе ми биде проблем, можеби тогаш нема да му се допадне“, вели таа.