Одделот за сузбивање на организиран и сериозен криминал и Одделот за специјални полициски операции – ЕБР денеска под раководство на надлежен јавен обвинител од ОЈО Скопје, спроведе координирана полициска акција во Казнено-поправната установа Идризово Скопје.

Според фотографиите кои ги испрати МВР, претресот е направен со кучиња – трагачи, а во 14-те келии на осудениците се пронајдени повеќе недозволени предмети, но и голема сума на пари.

Акцијата, како што соопшти полицијата е во насока на превентивно делување, како и спречување на вршење на кривични дела во казнено-поправните установи, а како резултат на продлабочената меѓуинституционална соработка.

-Постапувајќи по наредби за претрес, издадени од Судија за претходна постапка, извршени се претреси во вкупно 14 ќелии и две соби во казнено-поправната установа, при што биле пронајдени: поголема сума на парични средства од законски дозволените кои осудените лица можат да ги поседуваат во различни апоени и валути, таблет, 11 мобилни телефони, повеќе парчиња галантерија за мобилни телефони, неколку остри предмети, прашкаста материја, која била одземена, соопшти МВР.

Останатите пронајдени предмети за време на претресот ќе бидат предадени на затворска служба за понатамошна постапка.