„Оставка“, „правда за жртвите“, „предавници“. Овие пораки до Владата и надлежните институции ги упатија граѓаните вечерва на нов протест по скандалот на Онкологија за случајот со кражбата на лекови.

Ова е втор протест по објавите дека на пациентите им биле давани физиолошки раствори, а скапите лекови против канцерогените заболувања завршувале на црниот пазар.

„Нашите барања и ултиматум од овој протест се: ОЈО да излезе со детали за текот на истрагата во рок од една недела; истрага за инволвираноста на поранешниот министер Венко Филипче и на директорот Нино Васев; проширување на истрагата на работата на детската онкологија; целосна ревизија на работата на Клиниката за онкологија; правосилни судски пресуди за сите инволвирани во злосторството и криминалот на Онкологија; вклучување онколошки пациенти, кои ќе имаат увид во самата истрага“, порачаа организаторите.

Учесниците на протестот меѓу кои и пациенти порачаа, „Чашата е прелеана а тие се спремни да одат до крај и да си ги измијат рацете преку новите измени на Кривичниот законик, беше порачано од протестот. Масовните протести да станат норма против неправдата“.

Протестот почна пред еден час пред владата, маршот ќе продолжи преку „Рекорд“ до плошатад, а ќе заврши пред Основното јавно обвинителство.