Емиратската мултинационална компанија за развој на недвижности „Емар“ тврди дека во 2023 година дури 105 милиони посетители поминале низ Дубаи мол. Тоа е зголемување од 19 отсто во однос на 2022 година кога низ трговскиот центар поминале 88 милиони луѓе.

Тоа е новиот рекорд за оваа популарната туристичка дестинација во Дубаи која е изградена во 2008 година и се простира на неверојатни 1.200.000 метри квадратни до највисоката зграда во светот Бурџ Калифа, која е сместена во делот на градот попознат како „Даунтаун Дубаи“ (Downtown Dubai).

Најпосетуваното место во светот е Дубаи Мол во Обединетите Арапски Емирати, според тврдењето на сопствениците на гигантскиот трговски центар.

– Нашиот трговски центар го отсликува живиот дух на градот и посветената визија на раководството за совршеноста да стане реалност – рекол основачот на „Емар“, Мохамед Алабар при претставувањето на деловните резултати.

Дубаи мол вклучува околу 1.200 продавници на популарни брендови на облека, чевли, накит, часовници, електроника и слично во кои можете да купувате со часови. Кога ќе сакате да направите пауза, можете да изберете еден од 200 ресторани, кафулиња и други места за одмор.

Еден од најинтересните избори што се нудат е „Рејнфорест кафе“ (Rainforest Cafe), кој со светлосните ефекти симулира џунгла во урбана средина.

Да дојдете во Дубаи мол и да не го видите нивниот монументален аквариум и подводна Зоолошка градина би било штета. Аквариумот во Дубаи е исполнет со 10 милиони литри вода и е дом на 33.000 животни – од кои дури 300 ајкули и ражи. Цената на еднодневен билет за возрасни е околу 50 евра.

Дубаи мол го посетуваат локалните жители, но и туристи од целиот свет – особено од Европа, Кина и од Индија. Емар истакнал дека во првите 2 месеци од 2024 година, Дубаи Мол го посетиле околу 20 милиони луѓе, што сугерира дека рекордната посетеност ќе продолжи и понатаму во текот на годината.