Филипче: Се наоѓаме во трет бран, се отвораат нови ковид центри – мерките остануваат исти
Министерот за здравство Венко Филипче на денешната прес конференција заедно со претседателот на Комисијата за заразни болести д-р Жарко Караџовски изрази загриженост за рапидниот пораст на бројот на новозаразени поради што брзо се исполнуваат болничките капацитети низ земјата и има потреба од нови. На сила остануваат и претходно воведените рестриктивни мерки без најава за нови, барем до крајот на следната недела.
-Евидентно е дека се наоѓаме во третиот бран. Во изминатите 4 недели имаме постојан раст на бројките на заразени од Ковид 19. Во болниците, имаме 1100 пополнети болнички места, и во таа смисла се направи координација и систем на менаџирање со сите капацитети во земјава. Оттаму, се додадоа и нови ковид центри кои беа отворени. Но, и покрај тоа има доволен број на болнички капацитети. Сега сите ковид центри се во функција. Утринава имавме координација со Комисијата за заразни болести, и констатирано е дека имаме значително зголемен број на пациенти во одредени градови. Но, заклучокот е дека остануваат овие мерки на сила и нема да се додадат дополнителни нови, но откако ќе завршат овие мерки, односно кон крајот на следната недела ќе видиме дали ќе има нови рестрикции, истакна Филипче.