Меѓународната фудбалска федерација (ФИФА) одлучи дека Кардиф мора му го плати на Нант остатокот од парите за трансферот на Емилијано Сала, кој загина во авионска несреќа во 2019 година пред да игра за велшкиот клуб, објавија адвокатите на клубот од Франција.

Кардиф ќе треба да плати нешто повеќе од 11 милиони евра, што одговара на сумата на последните две рати, пренесува „Гардијан“.

Велшкиот клуб во јануари минатата година ја плати првата рата (шест милиони евра) за трансферот на поранешниот аргентински напаѓач, по првата одлука на ФИФА, по што следеше неуспешна жалба до Судот за спортска арбитража (ЦАС).

На 21 јануари 2019 година Сала загина во пад на мал туристички авион, кој го носеше од Нант во Кардиф, со кој тогаш 28-годишниот играч потпиша договор.

Според адвокатот на францускиот клуб, првите луѓе на Нант „едвај чекаат правниот аспект на оваа трагична несреќа да биде дефинитивно затворен“.

Кардиф, кој цели четири години инсистираше на тоа дека трансферот на Сала не беше завршен во моментот на несреќата, бара од Нант околу 100 милиони евра за загубата на приходите поврзани со оваа несреќа.

Организаторот на трагичниот лет на Емилијано Сала осуден на 18 месеци затвор