ФБИ предупредува: „ТикТок“ е проблем за националната безбедност на САД
Социјалната мрежа „Тик Ток“ е проблем за безбедноста на САД – предупреди директорот на ФБИ, Кристофер Реј, во пресрет на подготовката на американскиот Конгрес да гласа за легислативата за забрана на апликацијата.
„Апликацијата и припаѓа на кинеската компанија ByteDance, која „има обврски кон кинеската влада“, рече Реј во ексклузивно интервју за Ен-би-си Њуз.
Американските власти тврдат дека ТикТок и овозможува на кинеската влада да шпионира и манипулира 170 милиони корисници во Соединетите држави.
„Кога се разгледува моќта, пристапот, технолошките способности и контролата што ги има ТикТок, Американците треба да се запрашаат што мислат за моќта, пристапот, можностите и контролата што ги има компанијата што е сопственик на ТикТок, кинеската влада и, на крајот, кинеските разузнавачки служби“, посочува директорот на ФБИ.