Меѓународното жири на ХЕМИ (Центар за размена на музички иновации), составено од организатори на фестивали, промотори и продуценти, менаџери на музички експорт бироа и музички новинари, од вкупно 285 исклучителни европски таленти од Централна и Југоисточна Европа, избра 27, меѓу кои се наоѓаат едни од најквалитетните музички изведувачи од домашната сцена: „Фанк шуи“ (Funk shui), „Плуто’с даутс“ (Pluto’s doubts) и „Ју“ (Yöu).

Девет од 27-те кандидати ќе стигнат до втората фаза, која вклучува персонализирана поддршка, обука и вмрежување, а во последната фаза, три музички изведувачи ќе ја освојат музичката награда ХЕМИ. Таа е замислена како пакет кој ги покрива трошоците за создавање содржина, промотивни кампањи и турнеја на бројни интернационални шоукејс фестивали и конференции.

Музичките награди ХЕМИ е нова програма, наменета за талентирани музички изведувачи кои се подготвени да развијат меѓународна кариера и да ја пласираат својата музика на европско ниво. Програмата е организирана од ХЕМИ како европска иницијатива, која има за цел поддршка на изведувачи и професионалци во музичкиот бизнис од Чешка, Естонија, Грција, Унгарија, Северна Македонија, Полска, Романија, Србија и Словенија, соопштија од „Пасворд продукција“.

(Текстот е објавен во „Културен печат“ број 67, во печатеното издание на „Слободен печат“ на 6-7 февруари 2021)