Мултинационалниот автомобилски гигант Стелантис заклучи дека во моментов не може да произведува електрични возила по пристапни цени во Европа и бара поевтини производствени локации, како што е Индија.

Доколку Индија, со својата база на евтини добавувачи, ги исполни целите за квалитет и трошоци на Стелантис до крајот на следната година, може да ја отвори вратата за извоз на електрични возила на други пазари, рече извршниот директор Карлос Таварес. Стелантис произведува брендови како Фиат, Крајслер, Пежо и Опел, пренесе Ројтерс.

Стелантис инвестира многу во електрични возила и планира да произведе десетици модели во следните десет години, но Таварес во октомври предупреди дека ќе бидат потребни уште пет до шест години за да се произведат достапни електрични возила на батерии, објави Хина. „Денес проблемот со електричните возила е главно цената, а не технологијата“, нагласи Таварес.