ЕУ ќе учествува на мировната конференција за Украина што ќе се одржи во јуни во Швајцарија, рече денеска на прес-конференција портпарол на Европската комисија во одговор на новинарско прашање.

Тој појасни дека се уште не е добиена покана и не е утврдено кој ќе ја претставува ЕУ.

Го поздравуваме одредувањето датум, додаде портпаролот, откако вчера беше прецизирано дека средбата ќе се одржи на 15 и 16 јуни. „ЕУ ќе продолжи со напорите во потрага по најголема можна поддршка ширум светот за постигнување праведен и траен мир во Украина врз основа на украинскиот предлог“, додаде тој.

Според него, овие напори се насочени и кон идната светска средба за мир. „Со задоволство ќе учествуваме на конференцијата во Швајцарија, чекаме покана“, додаде портпаролот на Европската комисија.

Руската страна не планира да учествува на состанокот закажан за јуни, а Кина претходно изрази подготвеност да размисли за учество. Според швајцарската претседателка Виола Амхерд, на конференцијата не се очекува да биде одобрен никаков мировен план.