ЕП-У20 „Б“ дивизија: Македонија со убедлива победа против Велика Британија обезбеди полуфинале
Maкедонската кошаркарска репрезентација до 20 години денес обезбеди пласман во полуфиналето на Европското првенство од „Б“ дивизијата откако во „СРЦ Кале“ нашите млади кошаркари беа подобри од Велика Британија со 66:49.
Од почетокот на натпреварот Македонија го контролираше натпреварот и доби три од четирите четвртини, па така сосема заслужено се пласиравме во полуфиналето на турнирот.
Првата четвртина ја добивме со 17;11, а во втората гледавме слична слика на теренот, па така на пауза заминавме со двоцифрена предност од 32:21.
Во вториот дел бритнаските кошаркари беа нешто подобри, но сепак нашите кошаркари не дозволија да ја испуштат сигурната предност и во последниот период ја зголемивме предноста за убедлив триумф од 17 разлика. Андреј Митревски беше најефикасниот во нашите редови со 17 поени, додека зад него следеше Теодор Симиќ со 13.
За место во финалето Македонија ќе води битка со подобриот од натпреварот помеѓу Холандија и Украина кој се игра денес од 21:00 часот.