Битолчани предводени од тренерот Ларс Валтер на в петок (2 септември) со почеток од 20.30 часот ќе го игра полуфиналниот натпревар против унгарскиот клуб Веспрем во СЕХА Газпром лигата.

Е. Пелистер отпатува за Задар (Хрватска) каде што ќе го има својот дебитантски настап на Фајнал-фор турнирот во регионалното натпреварување.

Истиот ден, но од 18.00 часот е втората полуфинална пресметка помеѓу хрватските екипи на Нексе и ППД Загреб.

Данскиот стратег Валтер вели дека неговите играчи треба да уживаат, да играат слободно против еден од најдобрите светски клубови, Веспрем.

Емилијан Ѓорговски кој беше „прекомандуван“ од вториот тим на Е. Пелистер во првиот ветува дека ќе биде даден максимумот во полуфиналната борба.

– Ги почнав подготовките со Е. Пелистер и продолжив со нив. Напорно трениравме во Маврово, турнирот во Струга го поминавме одлично и така продолживме. Добив минутажа против Мешков Брест и одиграв максимално колку што можам. Ја остваривме целта и сега сме пред првиот историски настап на Ф4 во СЕХА лигата во Задар. Се гледа дека во тимот има повеќе хармонија, дружељубивост и борбеност. Веспрем е великан, бранител на СЕХА-титулата. Ќе дадеме максимум и ќе се бориме да го добиеме тој натпревар – се зборовите на Ѓорговски.