Уникс Казан поведе и со 3:1 во финалната серија во ВТБ лигата откако со 90:88 по едно одиграно продолжение го совлада Локомотив Кубан.

Во регуланиот дел од натпреварот Уникс Казан имаше и „плус 21“ предност (53:32), но Локомотив Кубан успеа да ја анулира негативата и да обезбеди дополнителни пет минути (81:81). Уникс Казан не дозволи целосен пресврт на овој меч и продолжението го доби со 9:7.

Овојпат македонскиот репрезентативец Ненад Димитријевиќ имаше скромен учинок од шест поени за нешто над 25 минути игра на паркетот (3/9 за два, 0/1 за три, 0/1 од слободните фрлања). Воедно нашиот плејмејкер запиша по четири скока и асистенции, по две украдени и загубени топки и една блокада.

Кај неговите соиграчи најефикасни беа Дерил Мејкон и Џејлен Рејнолдс со по 18 поени, а на спротивната страна Крис Хортон имаше 23 поени, а 22 беа дело на Џејлен Барфорд. Уникс Казан дојде на една победа од освојување на шампионскиот пехар, а првата „меч топка“ ќе ја има за три дена на домашен терен.

ЦСКА Москва на нашиот тренер Емил Рајковиќ исто така води со 3:1 против Зенит Петерсбург во борбата за третото место во натпреварувањето, а следниот меч ќе се игра на 15 мај.