Дијалог-изложба на израелските карикатуристи Григори и Илја Кац е поставена во „Остен“
Во галерија „Остен“ (ул. „Максим Горки“ 16а) на 25 јули, во 20.30 часот, ќе биде отворена изложбата на карикатури со наслов „2Кац“ на израелските карикатуристи Григори и Илја Кац, која претставува дијалог на уметнички начин помеѓу татко и син.
Изложбата е дел од програмските активности на „Остен“ со кои се одбележува 55-годишниот јубилеј на Светската галерија на карикатури (1969-2024), а кој е поддржан од Министерството за култура на РСМ и е во соработка со „Скопско лето 2023“.
– Концептот на изложбата „2Kац“ е двогледност – две визии на иста тема, два изрази на двајца уметници, еден постар и еден млад, татко и син. Нивните дела се претставени во тематски парови, давајќи секој пат драматичен конфликт на целината. Посетителите можат да се восхитуваат на делата преку „двогледни спектакли“ – истакнуваат од „Остен“.
Таткото Григори Кац и синот Илја се родени во Киргистан, соодветно во 1948 и 1972 година. Двајцата уметници живеат во Израел од 1992 година. Како „2Кац“ досега имале повеќе изложби, и тоа во Белгија, Кина, Словачка и во Израел.
Григори работи како архитект, карикатурист и илустратор. Од 2008 година започнал да учествува на меѓународни изложби и натпревари за карикатура и освоил повеќе од 60 награди на меѓународни натпревари за карикатура.
Илја е карикатурист, сликар и дизајнер. Почнал да учествува на меѓународни изложби и натпревари за карикатури во 2006 година и освоил повеќе од 100 награди на меѓународните натпревари за карикатура.