Данскиот милијардер Андерс Холч Повлсен (47) и неговата сопруга Ане, во мај минатата година се соочија го голема семејна трагедија. Нивните три деца Алма, Агнес и Алфред загинаа во велигденскиот терористички напад на Шри Ланка. Само најстарата ќерка Астрид преживеа.

Нешто помалку од година дена од бомбашкиот напад „Кралот на Шкотска“, како што го нарекуваат Повлсен, и Ане станаа родители на близначки.

„Ане и Андерс Холч Повлсен станаа родители на две здрави девојчиња, по лесната бременост и породување без компликации. Семејството со полно срце ги дочека овие две мали чуда. Многу сме возбудени што ќе ги запознаеме девојчињата и што дојдоа како потврда за животот“, стои во соопштението на нивната лична секретарка Кристен Монстер.

Се уште не се знаат имињата на девојчињата кои се родија во вторникот, а Андерс и Ана ги опишаа како „две мали чуда“.

Повлсен е сопственик на модниот ланец Bestseler, а и најголем земјопоседник во Шкотска. Исто така е најголем акционер на Асос, онлајн продавница за облека и козметика.

Неговото богатство се проценува на околу 5,6 милијарди долари. Своето богатство го наследи од родителите, а во Шкотска одлучил да вложува зошто уште како дете се вљубил во таа земја.

Инаку, во терористичките напада на Велигден 2019 година во Шри Ланка загинаа најмалку 290 лица, а ранети беа најмалку 500. Седум бомбаши самоубијци се разнесоа во цркви и луксузни хотели.

Туристичките агенции наводно предупредиле дека терористички групи планираат бомбашки напади, и како можни мети го посочиле туристичките атракции, хотелите, рестораните и аеродромите.