Познатиот британски телевизиски водител Пирс Морган и неговата сопруга Селија биле ограбени во нивната соба додека спиеле во луксузната вила во Франција.

Крадците украле пари и накит од нивната соба, пишува „Дејли мејл“. Сопругата на Пирс изјавила дека кога се разбудила (во 6:15 часот), собата била во целосен неред.

– Само што станав од кревет, знаев дека нешто не е во ред. Мојата торба беше превртена на каучот, а кутијата за накит беше целосно празна. Тие ни ги преместиле работите додека сме спиеле, бидејќи се сеќавам дека некои предмети не ги оставив на тоа место – рекла Селија.

Меѓу предметите што ги украле бил и прстенот кој што Пирс ѝ го подарил за нивната петта годишнина од свадбата. Селија веднаш повикала полиција, која набрзо пристигнала, а полицајците им рекле дека крадците заминале само 15 минути пред да се разбудат. По крадците се трага, а француската полиција рекла дека богатите туристи се честа мета на криминалците на Азурниот брег.