Европската куќа на фудбалот УЕФА се соочува со растечки притисок да го пресели финалето на Лигата на шампионите од Санкт Петербург на некое друго место. Причината за ваквиот притисок е политичко-воената криза помеѓу Русија и Украина.

Последна епизода е изјавата на министерката за надворешни работи на Велика Британија Лиз Трас за Скај спорт. На прашањето дали финалниот натпревар во ЛШ треба да се одржи во Санкт Петербург, Трас одговорила негативно.

– Не би требало да се одржи, јасно кажувам не би требало – изјавила министерката Трас.

Нaвестено е дека евентуално под санкции би можел да биде и рускиот сопственик на Челси, Роман Абрамович. УЕФА засега јасно не се откажува од одржувањето на финалето на „Газпром арената“ во Санкт Петербург. Финалниот меч е закажан за 28 мај.

– Што се однесува до финалето на ЛШ во Сант Петербург, УЕФА внимателно ја следи ситуацијата и ќе биде донесено одлука по потреба, ако е неопходно – испрати соопштение УЕФА.

Сепак, јасно е дека притисокот да се смени локацијата на финалето е се посилен. Британците имаат четири клуба се уште во трка за финалето, а тоа се Манчестер сити, Челси, Ливерпул и Манчестер јунајтед.

Британските медиуми лансираа шпекулација дека финалето би можело да биде префрлено од рускиот град во Лондон, а би се играло на Вембли. Според англиските таблоиди организацијата на финалето би можело на градот домаќин да му донесе 60 милиони фунти.