Браќата Бабунски сонуваат да играат заедно за Македонија на Светското првенство
Браќата Давид и Доријан Бабунски моментно ги бранат боите на унгарскиот клуб Дебрецин. Помладиот Доријан сезонава ја започна во Ботев Враца од Бугарија во чии редови имаше одлични настапи со 10 голови од 18 настапи по што го направи трансферот во Унгарија.
Доријан веќе има два настапи за Дебрецин, додека Давид од почетокот на сезоната има 10. Давид деветпати досега го носеше сениорскиот дрес, додека Доријан и натаму го чека дебито за националната А селекција.
Македонската сениорска репрезентација во март ќе игра полуфинале против Италија на гости во баражот за пласман на Светското првенство и доколку славиме пет дена подоцна ќе се соочиме со Португалија или Турција.
Браќата Бабунски посакуваат двајцата да бидат дел од нова историја во македонскиот репрезентативен фудбал учествувајќи заедно на Мундијалот во Катар годинава.
– Би било прекрасно да бидеме во можност да бидеме заедно во македонскиот дрес на следното Светско првенство, но ќе биде многу комплицирано бидејќи мора да ја елиминираме Италија, а потоа Турција или Португалија. Треба само да се верува – вели Доријан Бабунски во интервјуто за „sofoot.com“.
Давид исто така посакува заедно со неговиот брат да се најдат во составот на А селекцијата. И секако да продолжат да се подобруваат за да се доближат малку до најдобрата верзија од себе, како фудбалер и како човек.