Со задоцнување од 45 минути започна процесот „Рекет“, а судија во процесот е Васка Николовска – Масевска, додека застапник на обвинението е шефицата на Одделот за организиран криминал и корупција Вилма Русковска.

Бојан Јовановски е обвинет за примање награда за против законско влијание и за кривично дело перење пари. Зоран Милески е обвинет за примање награда за против законско влијание, додека Катица Јанева е обвинета за злоупотреба на службена положба и овластување.

– Добро е што во судница има голем број новинари, што ќе помогне навремено и реално да биде известена јавноста за процесот – изјави во уводниот збор судијката Николовска – Масевска.

Таа рече дека Боки 13 утринава имал здравствени проблеми, а затворскиот лекар напишал документ дека Јовановски не е свесен психички и физички да го прати процесот.

– Не се чувствувам добро. Состојбата не ми е добра и тешко ми е. Од утринава 10 пати блуев. На свое барање дојдов во суд за да ја искажам својата одбрана – рече Јовановски.

Неговиот адвокат Сашко Дуковски рече дека и тој инсистирал Боки 13 да дојде во судница, за да не се добие впечаток дека го одложуваат процесот.

– Тврдам дека препишана терапија не му се дава на мојот клиент. Вие проценете во каква состојба е – рече Дукоски.

Јованивски исто така потврди дека не му се дава соодветната препишана терапија.

Обвинителката Русковска рече дека лекарите во болница утврдиле дека Јовановски е во добра состојба и нема таков лекар кој ќе си ја ризикува лиценцата за да напише нешто невистинито.

Судот даде пауза од 20 минути за да ги утврди фактите, а за тоа време лекарска екипа која е присутна пред судот ќе го прегледа Јовановски по што ќе се одлучи дали денес ќе продолжи процесот.