Нови руски сили продолжуваат да пристигнуваат на украинската граница, а инвазијата на Украина може да започне во секое време, вклучително и за време на Зимските олимписки игри во Пекинг, изјави денеска американскиот државен секретар Ентони Блинкен.

За време на на состанокот на групата Quad, во Мелбурн Блинкен изјави дека Вашингтон ќе продолжи да го повлекува персоналот од својата амбасада и го повтори повикот на Стејт департментот американските граѓани во Украина веднаш да ја напуштат земјата, пренесе Ројтерс.

Quad е неформална група составена од САД, Австралија, Индија и Јапонија.

„Едноставно кажано, продолжуваме да забележуваме многу загрижувачки знаци на ескалација, вклучително и нови руски сили кои пристигнуваат на украинската граница“, рече Блинкен.

„Како што рековме претходно, ние сме во време кога инвазијата може да започне во секој момент , вклучително и за време на Олимписките игри“, додаде тој.

Русија распореди повеќе од 100.000 војници во близина на границата со Украина и ги негира обвинувањата на Западот дека планира да ја нападне земјата.

Зимските олимписки игри ќе се одржуваат во Пекинг до 20 февруари.