Германската компанија Бионтек ќе аплицира за одобрување на вакцината против коронавирусот, која ја разви заедно со американскиот фармацевтски гигант Фајзер, за употреба кај деца на возраст од 5 до 11 години, изјави извршната директорка Озлем Туречи, пренесува Ројтерс.

„Во текот на следните недели, ќе ги доставиме резултатите од нашето истражување за деца на возраст од 5 до 11 години до властите ширум светот и ќе аплицираме за одобрување на оваа вакцина во Европа“, изјави Туречи за списанието „Шпигел“.

Таа рече дека компанијата, со седиште во Мајнц, Западна Германија, започна да се подготвува за производство на вакцина за деца, која е иста како и за возрасните, но ќе се дава во помали дози.

Бионтек во моментов ги проценува податоците за помалите деца, на возраст од шест месеци и повеќе, а резултатите ќе бидат презентирани до крајот на годината.