Берлин ѝ дозволи на Полска да испрати пет стари германски „Мигови“ во Украина
Германија го одобри барањето на Полска за извоз на стари германски борбени авиони МиГ-29 во Украина, соопшти денеска германското Министерство за одбрана.
Полска побара одобрение од Берлин за извоз на пет стари германски авиони „МиГ-29“ од советско производство, како помош за зајакнување на воздушните сили на Украина во одбраната од руската агресија.
Полското Министерство за одбрана сѐ уште не го коментирало соопштението од Берлин.
Германија наследи 24 авиони „МиГ-29“ од поранешна Источна Германија во процесот на реобединување во 1990 година. Во тоа време, овие борбени авиони беа меѓу најнапредните во светот.
Во 2004 година, Берлин им предаде 22 од овие авиони на полските воздухопловни сили. Од преостанатите два, едниот е уништен, а другиот е во музеј.
За да може тие авиони да ги препрати во трета земја, во овој случај Украина, Полска треба да побара согласност од Берлин.
Украинскиот претседател Володимир Зеленски за време на неговата посета на Варшава минатата недела изјави дека Полска ќе помогне во формирањето на коалиција на западните сили која ќе испорачува борбени авиони на Киев.