Американскиот претседател Џо Бајден денеска, додека демонстрантите накратко го прекинаа неговиот говор повикувајќи на прекин на огнот во Газа, рече дека „дискретно работи“ за да го натера Израел „значително да го намали“ своето присуство на палестинската територија.

Бајден зборуваше во црквата во Чарлстон каде девет лица, вклучително и свештеник и верници, беа убиени во 2015 година во еден од најлошите расистички напади во САД.

„Ако навистина се грижите за изгубените животи овде, тогаш треба да повикате на прекин на огнот во Палестина“, извика еден од демонстрантите.

Американскиот претседател, кој го поддржува Израел, досега одбиваше да повика на прекин на огнот во Газа, бидејќи верува дека тоа главно ќе биде од корист за Хамас.

Сепак, тој се обидува да се постигне деескалација во Газа и да се спречи ширењето во Либан.