Азески: Потребен е национален консензус за извозот
Само 440 производи се со компаративни предности и тоа е една од целите која треба да се надградува, смета првиот човек на СКСМ
Доста е од констатации, ќе одиме со конкретни предлози со кои треба да се постигне национален консензус за извозот, порача претседателот на Националниот совет за извоз и на СКСМ, Бранко Азески. Посетата на компанијата „Џонсон Мети“ во ТИРЗ – Скопје 1, беше и прва активност на новоформираното тело во кое членуваат претставници на владини институции и на приватниот сектор.
– Само пет проценти од македонските компании извезуваат. Тоа е поразителна бројка – рече Азески истакнувајќи дека промената на оваа состојба е првата и основна задача на Националниот совет за извоз. Според него, многу мал број компании во нашата држава се вклучени во синџирите за снабдување на странските инвеститори, а тоа е треба да добие на интензитет. Азески оцени дека на Македонија ѝ е судено „алфа и омега за нејзиниот опстанокот да е извозот и мора да се постават приоритети што тоа ќе го поддржат.
Азески соопшти и дека само 440 производи се со компаративни предности и тоа е една од целите која треба да се надградува.
– Моја генерална оценка е дека и ние и политичките чинители во државава одиме кон определување приоритети и постигнување консензус. Клучно е да постигнеме договор околу економијата како врвен приоритет во наредните 10 години, како поддршка на извозот во наредните 10 години како клучна компонента на развојот, но и регионалната соработка – наведе Азески.