Активистката Драгана Велковска повторно бара разрешување на директорката на „Лајка“
Активистката за заштита на животни и животна средина и членка на Советот на Град Скопје Драгана Велковска, денеска повторно побара разрешување на директорката на ЈП „Лајка“ Тина Петрушевска. Како што се вели во соопштението упатено до медиумите, таа испратила и Претставка до Агенција за храна и ветеринарство за незаконско работење на стационарот.
Протест пред „Лајка“: Здруженијата за заштита на животни побараа итна оставка од директорката
Како што вели Велковска, неподобни лица се назначени да решаваат важни прашања, а како резултат на тоа во Скопје ни за илјада години нема да се намали бројот на бездомни животни на улиците.
– Воспоставувањето контрола врз бројот на бездомни животни подразбира работење во согласност со законот, унапредување на законите во склад со најновите научни податоци и искрена посветеност на етички и хуман третман на животните. Ефективното, но најважно од сè, хумано справување со бројот на бездомните животни е многу важен приоритет за жителите на Скопје, вклучително оние кои не се љубители на животни. Крајно време е вистинските луѓе да ги заземат вистинските места. Поставувањето на неподобни кадри е на штета и на луѓето и на животните, се вели во барањето на Велковска.